Ел узып бара: куанычлары белән истә калсын

2017 елның 28 декабре, пәнҗешәмбе
Могҗизага ышанырга гына кирәк, бигрәк тә Яңа ел алдыннан аларның чынга аша торган гадәте бар. Әнә бит Мәдәният сараенда ел йомгаклары уңаеннан узган “Эшмәкәрләр балы”нда яшь лениногорскилыларның күптәнге хыяллары чынга ашты. Аз тәэмин ителгән, шулай ук күпбалалы гаиләләрдә тәрбияләнүчеләрнең кайсы телефонлы, икенчеләре спорт җиһазлы булды.
 
Аларның хыялларын тормышка ашырырга депутат, предприятие-оешма, хәйрияче абый-апалары ярдәм иткән. Алар ел саен шундый бүләк әзерләп, балаларга шатлык-куанычлар бүләк итә, бу исә бала өчен Яңа ел алдыннан әкияткә тиң була.
Гомумән алганда, узып баручы ел төрле вакыйгалар, социаль объектлар ачылуы белән истә калды. Нәрсәләр эшләнде соң, дип баш ватарга кирәкмәде: залда утыручыларга күрсәтелгән фильмда елның мөһим вакыйгаларыннан мизгелләр карап, барысы да күз алдыннан йөгереп үтте. Район башлыгы Рәгать Хөсәенов үзенең котлау чыгышында әйткәнчә, Лениногорск районы ышаныч белән алга таба атлый.
  • Шунысы шатлыклы: гамәлдә булган программалар ярдәмендә төзекләндерү, ремонт эшләре, юл төзү, салу кебек эшләрне башкара алабыз. Шәһәрдә ишегаллары ямьләнде, йортлар капиталь ремонттан соң икенче төс ала, яңа йортлар сафка баса. Районның икътисади күрсәткеченең бер өлешен тәшкил иткән авыл хуҗалыгы тармагы да ныклы үсештә: быел 104 мең тоннадан артык бөртеклеләр җыеп алдык, сөт җитештерү дә узган елдан артык бара. 2018 елда безне зур эшләр, яңа проектлар көтә, планнарны тормышка ашырыр өчен нык тырышлык белән эшләргә туры киләчәк, - ди Рәгать Галиәгъзамович.
Ул шулай ук киләсе елда мөһим вакыйга – Россия Президенты сайлаулары икәнен искә төшерде, сайлауга баруны гражданлык бурычы булуын аңлап, лаеклы кандидат өчен тавыш бирергә чакырды.
Лениногорскилыларны Яңа ел белән котларга Россия Дәүләт Думасы депутаты Равил Хөснуллин килгән иде. Ул шәһәрнең үзенчәлекле ландшафтлы булуын, матур шәһәр икәнен билгеләде. Киләчәктә дә, депутат буларак, ешрак очрашачакбыз , диде. Шулай ук үзара салым кертү буенча киләсе елда референдум узмаячак, халык җыенында сөйләшеп, килешкәннән соң җыярга мөмкин булачак, дигән яңалык җиткерде. Бу урында залдан алкышлар яңгырады, күбесенчә авыл башлыклары хуплагандыр, дип аңлашылды.
Яңа ел бүләксез булмый дигәндәй, “Эшмәкәрләр балы”нда шәһәр һәм район үсешенә зур өлеш кертүчеләргә муниципаль районның Рәхмәт хатлары һәм истәлекле бүләкләр тапшырылды. Аерым кешеләр республика дәрәҗәсендәге Рәхмәт хатларына да ия булды. Мәсәлән, ветераннар советы рәисе Марс Исхаковка Россия Федерациясе Иҗтимагый палатасы һәм республика Яшьләр эшләре һәм спорт министрлыгыннан, аның урынбасары Николай Степановка Россия Федерациясе Иҗтимагый палатасы, Бөтендөнья татар конгрессыннан Наил Сәйдәшевка, Татарстан Дәүләт Советы Рәисе исеменнән Владимир Никишинга Рәхмәт хатлары тапшырдылар.
Ул көнне залда утыручыларга Мәдәният сарае коллективлары, үзешчән артистлар бәйрәм кәефе бүләк итте, яңа ел мохитенә алып керде. Совет заманыннан күпчелегенә таныш булган, яратып караган “Простоквашино” мультфильмына корылган бәйрәм эчтәлеге саф, эчкерсез балачакка алып кайтты.
 
Розалия Мустафина
Фоторепортаж
БАРЛЫК ЯҢАЛЫКЛАРНЫ УКУ
ЯҢАЛЫКЛАРГА ЯЗЫЛУ
Район турында
Документлар
Коррупциягә каршы көрәш
Гражданнарның мөрәҗәгатьләре
Адрес: 423250, Татарстан Республикасы, Лениногорск шәһәре, Кутузова урамы, 1 йорт
Телефон: (85595) 5-06-52
Факс: (85595) 5-16-42
E-Mail: leninogorsk@tatar.ru
Без социаль челтәрләрдә:
Сорау бирү
Обычная версия
Сайттагы барлык материаллар лицензия буенча тәкъдим ителә:
Creative Commons Attribution 4.0 International